विदेशबाट फर्काइएका २१ मूर्ति संग्रहालयलाई हस्तान्तरण

१७ चैत, काठमाडौं । संस्कृति, पर्यटन तथा नागरिक उड्डयनमन्त्री बद्री पाण्डेले नेपालबाट चोरी भई संसारको जुनसुकै कुनामा पुगेको भए पनि फिर्ता ल्याउने बताएका छन् ।

नेपालबाट विगतमा चोरी भएर अमेरिका पुगेका थप २१ वटा पुरातात्विक महत्त्वका मूर्ति नेपाल फर्काएर पाटन संग्रहालय र राष्ट्रिय कला संग्रहालयलाई आइतबार हस्तान्तरण गर्दै मन्त्री पाण्डेले यस्तो बताएका हुन् ।

‘हाम्रा सम्पदा संसारको कुनै पनि कुनामा पुगोस्, नेपालीले हाम्रा आफ्ना सम्पदा चिन्छन् । त्यसको महत्त्व जान्दछन् र त्यसलाई फर्काएर ल्याउने कुरामा संसारभरि फैलिएका नेपालीले योग्यता राख्दछन्,’ उनले भने ।

नेपालको सम्बन्ध विश्वव्यापी भएको भन्दै उनले चोरीका मूर्ति नेपाल फर्काएछौं भन्ने सकारात्मक सन्देश दिन सफल भएको उनको भनाइ छ । उनले विगतमा नेपालका महत्त्वपूर्ण पुरातात्विक मूर्ति कसरी विदेश पुगे भन्दै प्रश्न गरे ।

मन्त्री पाण्डेले शक्तिशाली रूपमा नेपालका मूर्ति चोरी गरेर जहाज मार्फत ठूलो सेटिङमा विदेशमा पुर्‍याउने दुस्साहस गरिएको उल्लेख गर्दै विदेश पुर्‍याइएका सम्पूर्ण मूर्ति नेपाल फर्काइने विश्वास दिलाए ।

जुन ठाउँबाट चोरी भएका हुन् सोही ठाउँमा उक्त मूर्ति प्रतिस्थापन गरिने विश्वास व्यक्त गरे । पर्यटन मन्त्रालय मातहतका पुरातत्व विभागले हालसम्म बेलायत, अस्ट्रिया, अमेरिका, चीन, तिब्बत, भारत, जर्मनी, अस्ट्रेलिया र इटालीबाट कुल १ सय ७७ थान पुरातात्विक महत्त्वका मूर्ति फिर्ता भइसकेको जनाएको छ ।

अमेरिका, फ्रान्स, बेलायत, चीन, अस्ट्रिया, अस्ट्रेलिया जस्ता देशबाट थप मूर्ति फिर्ताका लागि कूटनीतिक पहल भइरहेको जनाइएको छ । हालसम्म अमेरिकाबाट मात्र नेपालमा फिर्ता भएका पुरातात्विक महत्त्वका वस्तुको संख्या १ सय ४ पुगेको छ ।