पोखरामा अन्तर्राष्ट्रिय स्तरको पुरुष भलिबल प्रतियोगिता हुने

१४ चैत, काठमाडौं । लायन्स इन्टरनेशनल डिष्ट्रिक्ट ३२५ एम नेपालको आयोजनामा पोखरामा अन्तर्राष्ट्रिय स्तरको लायन्स कप पुरुष भलिबल प्रतियोगिता हुने भएको छ ।

आयोजकले बिहीबार पोखरामा पत्रकार सम्मेलन गर्दै प्रतियोगिता २०८२ वैशाख १८ देखि २२ गतेसम्म पोखरा रंगशालास्थित मल्टिपर्पोज हलमा हुने जानकारी दिएको हो । पोखरामा पहिलो पटक इन्डोर हलमा अन्तर्राष्ट्रिय स्तरको भलिबल हुन लागेको हो ।

मानविय सेवा गर्ने कम्पनी लायन्स इन्टरनेशनलको स्थापनाको १०७ वर्ष र नेपालमा यसको स्थापना भएको ५३ वर्ष पूरा भएको अवसरमा नेपालको राष्ट्रिय खेल भलिबललाई प्रवर्द्धन गर्दे उद्देश्यले नेपालमा पहिलो पटक अन्तर्राष्ट्रिय स्तरको लायन्स कप भलिबल आयोजना गर्न लागेको लायन्सका डिष्ट्रिक्ट गभर्नर चण्डीप्रसाद अर्यालले बताए ।

प्रतियोगितामा कूल ६ टोलीहको सहभागिता हुनेछ । जसमा दुई विदेशी टिम सहभागि हुने लायन्सका डिष्ट्रिक्ट गभर्नर चण्डीप्रसाद अर्यालले जानकारी दिए । अहिलेसम्म नेपालका तीन विभागीय टोली र गण्डकी प्रदेशसहित पाकिस्तान भलिबल क्लब, इस्लामावादको सहभागिता टुङ्गो लागिसकेको छ ।

यस्तै भारत र इरानको टोलीसँग सल्लाह भइराहेको र त्यसमध्ये एउटा टिमलाई सहभागी बनाइने डिष्ट्रिक्ट गभर्नर अर्यालले बताए ।

प्रतियोगिताको विजेताले ४ लाख ४४ हजार ४४४ ट्रफी, मेडल र प्रमाणपत्र प्राप्त गर्ने आयोजकले जनाएको छ । यस्तै उपविजेताले २ लाख ४४ हजार ४४४ रुपैयाँसहित ट्रफी, मेडल र प्रमाणपत्र पाउने छ भने तेस्रो हुनेले १ लाख ४४ हजार ४४४ पाउनेछ ।

यसैगरी सर्वोत्कृष्ट खेलाडीले नगद १४ हजार ४४४ र विधागततर्फ उत्कृष्ट हुने खेलाडीहरुले समान ८ हजार ४४४ रुपैयाँ प्रदान प्राप्त गर्नेछन् ।