बयलपाटा अस्पतालको विषयले संसदमा प्रवेश पाउँदै

१२ फागुन, काठमाडौं । अछामको बयलपाटा अस्पतालको विषयले संसदमा प्रवेश पाउने भएको छ । यसअघि अछामबाट संघीय संसद्‍मा प्रतिनिधित्वि गर्ने प्रतिनिधि सभा सदस्य शेरबहादुर कुँवरले बयलपाटा अस्पतालको सेवा निरन्तरता माग्दै संसद्‍मा ध्यानाकर्षण प्रस्ताव लगेका थिए ।

उक्त ध्यानाकर्षण प्रस्ताव आज (सोमबार) संसदमा प्रस्तुत हुँदैछ । ध्यानाकर्षण प्रस्तावका आधारमा सांसद कुँवरले संसदमार्फत् स्वास्थ्य तथा जनसंख्यामन्त्रीको ध्यानाकर्षण गर्नेछन् । यो प्रस्तावमा आधारित रहेर सांसद्वय दयालबहादुर शाही र पुष्पबहादुर शाहले स्पष्टीकरण माग गर्नेछन् ।

नेपाली कांग्रेसका सांसद पुष्पबहादुर शाह पनि अछामबाटै संघीय संसद्‍मा प्रतिनिधित्व गर्ने प्रतिनिधि सभा सदस्य हुन् । नेकपा एमालेका सांसद दयालबहादुर शाही बाजुराबाट संघीय संसद्‍मा प्रतिनिधित्व गर्छन् ।

सांसद कुँवरका अनुसार अछाम जिल्लाको साँफेबर नगरपालिका–७ स्थित बयलगडमा यो अस्पताल रहेको छ । २०६५ सालदेखि नेपाल सरकार स्वास्थ्य तथा जनसंख्या मन्त्रालय र पोसिबल हेल्थ अमेरिकाको न्याय हेल्थ नामक गैरसरकारी संस्थाबीच सम्झौतामा अस्पताल सञ्चालन हुँदै आएको छ । तर, पछिल्लो समय नेपाल सरकारले अनुदान नदिँदा समस्या भएको ध्यानाकषण पत्रमा उल्लेख छ ।

‘१५ वर्षदेखि अनवनत रुपमा सुदुरपश्चिम र कर्णाली प्रदेशका केही जिल्लाका विपन्न र पछाडि परेका नागरिकले सेवा पाउँदै आएकोमा विगत दुई वर्षदेखि नेपाल सरकार र प्रदेश सरकारबाट अनुदान अभावका कारण सेवा लिंदै आएका जनताहरू उक्त अस्पतालको सेवाबाट बन्चित हुने अवस्था आएकाले उक्त अस्पतालको सेवा निरन्तरताका लागि यो ध्यानाकर्षण प्रस्ताव गरिएको छ’ पत्रमा उल्लेख छ ।