मगरघाट शवदाह गृहलाई ३५ लाखको मेसिन हस्तान्तरण

०८ फागुन, बुटवल । हाइड्रो व्यवसायी ज्ञानेन्द्रलाल प्रधानले रुपन्देहीको तिलोत्तमास्थित मगरघाटमा पर्यावरण मैत्री शवदाह गृहका लागि ३५ लाख रुपैयाँ मूल्यको आधुनिक मेसिन दिएका छन् ।

नेपालका ९ स्थानमा शवदाह मेसिन र एउटा शवदाह वाहन गरी १० करोड रुपैयाँ खर्च गर्ने योजना अन्तर्गत प्रधानले पहिलो मेसिन तिलोत्तमामा दिएका हुन् ।

मेसिन जडानका लागि इन्जिनियरिङ डिजाइनमा १५ लाख समेत गरी ५० लाख खर्च भएको प्रधानले बताए ।

परम्परागत ढंगले दाउराको प्रयोगबाट शव दाह गर्दा फ्याँकिने वस्तुका कारण नदीहरूमा भइरहेको फोहोर तथा प्रदूषण रोक्न र अन्त्येष्टि कार्यलाई आधुनिक र पर्यावरणमैत्री बनाउने उद्देश्यले रोटरी इन्टरनेसनल डिस्ट्रिक्ट ३२९२ सँग सम्झौता गरी काम अघि बढाएको प्रधानले बताए ।

पर्यावरणमैत्री रोटरी शवदाह गृह निर्माण पूरा गरी बिहीबार एक कार्यक्रमका बीच तिलोत्तमा नगरपाकिलाका प्रमुख रामकृष्ण खांण, रोटरी डिस्ट्रिक्ट गभर्नर राजेन्द्रमान शेरचन र मेसिनका दाता प्रधानले मगरघाट विकास तथा व्यवस्थापन परिषद्‍का अध्यक्ष तेजमान थापालाई हस्तान्तरण गरेका हुन् ।

प्रधानले ललितपुर महानगरपालिका र अन्य दुई स्थानीय तहमा विद्युतीय शवदाह मेसिन र अन्य ठाउँमा तिलोत्तमाको जस्तै मेसिन जडान गरिदिने योजना रहेको सुनाए ।

मलेसियन प्रविधिको उक्त मेसिनमा शव जलाउँदा निस्कने धुवाँको ९० प्रतिशत प्रदूषण रोकिने तथा दाउरा र समय दुवै आधा कम लाग्ने प्रधानले बताए ।

‘४२ वर्षदेखि पानीबाट विद्युत् निकाल्ने व्यवसायमा छु तर नदीको स्वच्छ पानीलाई परम्परागत ढंगले दाहसंस्कार हामीले फोहोर र प्रदूषित बनायौं, अब यसलाई रोक्नुपर्छ र दाहसंस्कारलाई आधुनिक र प्रविधिमैत्री बनाउन तीनै तहका सरकारको ध्यानाकर्षण गराउन ९ ठाउँमा आधुनिक शवदाह मेसिन र एउटा शवदाह वाहन खरिद गर्न १० करोड बजेट खर्च गर्दैछु,’ प्रधानले भने, ‘हिन्दु बाहुल्य मुलुकमा अन्त्येष्टिका क्रममा नदीहरूमा हुने फोहोर र प्रदूषणबारे कसैले चासो नदिएको हुँदा यसबारे पर्यावरणीय र वातावरणीय सचेतना फैलाउने उद्देश्य पनि हो ।’

प्रदूषणमुक्त दाहसंस्कार गर्ने मेसिन बनाउन डा. महाविर पुनसँग थप मद्दत लिएर काम गरिरहेको उनले बताए ।

मेसिन सञ्चालनका लागि घाटमा अक्षयकोष स्थापना गर्ने र मृत्यु हुने व्यक्तिको परिवारबाट न्यूनतम शुल्क लिएर त्यसबाट वृक्षारोपण गरी वातावरण संरक्षण गर्न सकिने र भविष्यमा दाउराको स्रोत हुने उनले सुझाव दिए ।

परियोजना संयोजक बिन्ध्याकेशर जोशीले पर्यावरणमैत्री शवदाह गृहको संरचना निर्माणमा तिलोत्तमा नगरपालिकाबाट १० लाख रुपैयाँ तथा ८७ जना दाताहरूबाट ३७ लाख रुपैयाँ आर्थिक सहयोग भएको बताए ।

मगरघाट विकास तथा व्यवस्थापन परिषद्‍का अध्यक्ष तेजमान थापाले पर्यावरणमैत्री नयाँ मेसिनबाट शवदाह गर्दा वातारवण संरक्षणमा योगदान पुग्ने बताए ।

तिलोत्तमा नगरपालिकाका प्रमुख रामकृष्ण खाँणले आधुनिक मेसिन सहितको शवदाह गृहले पर्यावरण संरक्षणमा टेवा पुग्ने भन्दै यसलाई सबै स्थानीय तहले अनुशरण गर्नुपर्ने बताए ।