क्रिप्टो बजारमा भारी गिरावट: ब्याजदर नघट्ने फेडरल रिजर्भको संकेतपछि बिटक्वाइन र ईथरमा असर

०१ फागुन, काठमाडाैं । अमेरिकी फेडरल रिजर्भले ब्याजदरमा प्रारम्भिक कटौती गर्ने कुनै हतार नगर्ने संकेत दिएपछि क्रिप्टो बजार बुधबार थप दबाबमा पर्‍यो। बजार मूल्यका हिसाबले सबैभन्दा ठूलो क्रिप्टोकरेन्सी बिटक्वाइनको मूल्यमा १.५० प्रतिशतभन्दा बढी गिरावट आएको छ।

बुधबार प्रकाशित रिपोर्टअनुसार, अन्तर्राष्ट्रिय क्रिप्टो एक्सचेन्ज बिनान्समा बिटक्वाइनको मूल्य लगभग ९६,१०० अमेरिकी डलरमा झरेको छ। केही समयअघि अमेरिकी राष्ट्रपति ट्रम्पको सपथ ग्रहणको समय यसको मूल्य १ लाख ७ हजार अमेरिकी डलर माथि पुगेको थियो।

त्यसैगरी, दोस्रो सबैभन्दा ठूलो क्रिप्टोकरेन्सी ईथरको मूल्य झण्डै २ प्रतिशतले घट्दै २,६३४ डलरमा कारोबार भइरहेको छ। सोलाना, पोल्काडोट, ट्रोन, लाइटकोइन, स्टेलर र एक्सआरपी जस्ता अन्य प्रमुख क्रिप्टोकरन्सीहरूमा पनि भारी गिरावट आएको छ। पछिल्लो २४ घण्टामा, क्रिप्टो बजारको कुल पुँजीकरण करिब २.८० प्रतिशतले घट्दै ३.१५ ट्रिलियन डलरमा सीमित भएको छ।

फेडरल रिजर्भका अध्यक्ष जेरोम पावेलले ब्याजदर कटौतीको विषयमा हतार नगर्ने स्पष्ट संकेत दिएका छन्। विश्लेषकहरूका अनुसार, यस निर्णयले बिटक्वाइन तथा अन्य डिजिटल सम्पत्तिहरूमा नकारात्मक प्रभाव पारेको छ। साथै, अमेरिकी धितो तथा विनिमय आयोग (SEC) ले क्रिप्टो बजारको नियमनका लागि नयाँ कार्यदल गठन गर्ने जानकारी दिएपछि बजारमा थप अस्थिरता देखिएको छ।

क्रिप्टोकरेन्सीप्रति विभिन्न राष्ट्रहरूको फरक दृष्टिकोण कायमै छ। भारतमा रिजर्भ बैंक अफ इन्डियाले (RBI) क्रिप्टोकरेन्सीमा पूर्ण प्रतिबन्ध लगाउन माग गरेको छ। यसैबीच, दुबईस्थित क्रिप्टो एक्सचेन्ज बाइबिटले भारतीय नियामक नियम उल्लंघन गरेको भन्दै ९ करोड रुपैयाँभन्दा बढी जरिवाना तिरेको छ। भारतीय फाइनान्सियल इन्टेलिजेन्स युनिटले नियम पालना नगरेको आरोपमा यो जरिवाना लगाएको हो।

बिटक्वाइन अहिले ९६,१०० डलरको तहमा रहेको छ भने १ लाख डलरभन्दा माथि पुग्न कठिन देखिएको छ। ईथरका लागि ३,००० अमेरिकी डलर बलियो प्रतिरोधको रूपमा देखिएको छ। यदि बजारले आगामी दिनमा सकारात्मक संकेत नपाए, भने थप गिरावट आउन सक्ने अनुमान गरिएको छ।

क्रिप्टो लगानीकर्ताहरूले बजारको उतारचढावलाई ध्यानमा राख्दै सचेत निर्णय गर्नुपर्ने देखिन्छ।