ललितपुर मेयर कप भेट्रान फुटबल प्रतियोगिता पुस २२ देखि

१० पुस, काठमाडौं । ललितपुरमा आगामी पुस २२ गतेदेखि दोस्रो संस्करणको ललितपुर मेयर कप ८-ए-साइड भेट्रान फुटबल प्रतियोगिता हुने भएको छ ।

कुसुन्ती यूवा क्लब र ललितपुर महानगरपालिका वडा नं. १३ वडा स्तरीय यूवा क्लबको संयुक्त आयोजना तथा ललितपुर महानगरपालिका-१३ को समन्वयमा २२ गते देखि २९ गते सम्म जावलाखेल खेल मैदानमा हुन लागेको हो ।

प्रतियोगिताको विजेताले दुई लाख रुपैयाँ तथा उपविजेताले एक लाख रुपैयाँ प्राप्त गर्ने छन् । त्यसैगरी हरेक खेलका म्यान अफ द म्याच, उत्कृष्ट खेलाडी, उत्कृष्ट गोलकिपर, उत्कृष्ट डिफेन्स, म्यान अफ द सिरिजलाई पनि पुरस्कारको व्यवस्था गरिएको छ ।

प्रतियोगितामा भाग लिनका लागि ४० देखि ४५ वर्ष उमेरका चारजना, ४५ देखि ५० वर्ष उमेरका तीनजना र ५० वर्षभन्दा माथिका एक जना खेलाडी गरी टिम बनाउनुपर्नेछ ।

प्रतियोगितामा हालसम्म २२ वटा टिमले नाम दर्ता गराइसकेको र ३२ टोलीको सहभागिता हुन सक्ने अनुमान गरिएको छ ।

उक्त प्रतियोगिताको अन्तिम दिन नेपाली राष्ट्रिय फुटबल खेलमा योगदान दिने भूतपूर्व खेलीडीहरुलाई सम्मान गर्ने कार्यक्रम पनि रहेको छ ।