चलचित्र विकास बोर्डलाई प्राप्त भए ‘७२ पटकथा’

२६ मंसिर, काठमाडाैँ । चलचित्र विकास बोर्डले सुरुआत गरेको पटकथा सङ्ग्रहालयमा चलचित्रमार्फत उत्साहजनकरुपमा पटकथाहरू प्राप्त भइरहेको जनाएको छ ।

बोर्डका अध्यक्ष दिनेश डिसीले ‘कबड्डी ४’, ‘बोक्सीको घर’, ‘छक्कापञ्जा ५’, ‘अन्तराल’, ‘दुई नम्बरी’, ‘चिसो मान्छे’ र ‘नाङ्गो गाउँ’ लगायतका ७२ चलचित्रको पटकथा प्राप्त भएको जानकारी दिनुभयो ।

“नेपाली फिल्मको पटकथालाई अभिलेखको रुपमा राख्ने तयारीअनुसार हामीले सङ्कलन गरिरहेका छौँ । केही समयपछि यहाँ आएर सर्वाधिक सफल भएका वा राम्रो हुँदाहुँदै पनि दर्शकको साथ नपाएका चलचित्रको पटकथालाई नव चलचित्रकर्मीले पढ्न पाउनुहुनेछ । यो उहाँहरूको लागि प्रारम्भिक ज्ञानको रुपमा उपयोगी हुनेछ”, अध्यक्ष डिसीले भन्नुभयो ।

उहाँले पटकथा सङ्ग्रहालयले नयाँ पुस्तालाई घरेलु चलचित्रको इतिहास बुझ्न सजिलो बनाउने विश्वास व्यक्त गर्नुभयो । “हामीले अहिले बोर्डलाई लयमा ल्याउन अहोरात्र मिहेनत गरिरहेका छौँ । यहाँको बेथिति र ढिलासुस्तीलाई हटाउँदै काम गरिरहेकाले नेपाली चलचित्रकर्मीलाई लाभ दिनेछ । नयाँ चलचित्र ऐन, रियल टाइमबक्स अफिसमा डाटा प्राप्त हुने लगायतका काम यही वर्षको अन्त्यसम्म गर्ने हाम्रो उद्देश्य छ”, अध्यक्ष डिसीले भन्नुभयो ।