चीनमा नेपाल पर्यटन प्रवर्द्धन

२४ मंसिर, काठमाडौं । प्यासिफिक एसिया ट्राभल एसोसिएसन (पाटा) नेपाल च्याप्टरले चीनमा नेपाल प्रवर्द्धन गरेको छ ।

चीनको ‘ग्वान्झाउ इन्टरनेसनल ट्राभल फेयर’ अन्तर्गत २ डिसेम्बरमा ग्वान्झाउ र ४ डिसेम्बरमा सेन्झेनमा आयोजित प्रवर्द्धन कार्यक्रम आयोजना सम्पन्न भएको छ ।

रोड शोमा २ सय ५० भन्दा बढी आउटबाउन्ड टुर अपरेटर र मिडिया प्रतिनिधि समक्ष गन्तव्य नेपाल र आगामी २४–२६ फेब्रुअरी २०२५ सम्म नेपालको पर्यटन राजधानी–पोखरामा आयोजना हुने ‘नेपाल–इन्डिया–चाइना एक्स्पो’ बारे प्रवर्द्धन गरिएको पाटाले जनाएको छ ।

पाटा–नेपाल च्याप्टर अध्यक्ष खेम लकाई, प्रमुख कार्यकारी अधिकृत सुरेशसिंह बुडल र नाइस २०२५ का सद्भावना दूत तथा चीन बजारका विज्ञ सल्लाहकार प्रा. डा. वोल्फगाङ जर्ज अर्ल्टले नेपालको पर्यटन सम्भावना उजागर गर्दै पर्यटन विकास र प्रवर्द्धनका लागि सहकार्य र पर्यटन आदान–प्रदानका असीमित अवसरबारे जानकारी गराएका थिए ।

प्रधानमन्त्री केपी शर्मा ओलीको औपचारिक चीन भ्रमण क्रममा चिनियाँ सरकारद्वारा ‘नेपाल पर्यटन वर्ष २०२५’ को औपचारिक घोषणा भएको थियो ।

यस रोड शोले नाइस कार्यक्रमलाई अपेक्षित उद्देश्य प्राप्तिका लागि महत्त्वपूर्ण कोसेढुंगाका रूपमा चिनाएको पाटाले जनाएको छ ।