सिरियाबारे छलफल गर्न रूसले बोलायो राष्ट्रसंघ सुरक्षा परिषद्को आकस्मिक बैठक

२४ मंसिर, काठमाडौं । रूसले सिरियाको अवस्थाबारे छलफल गर्न संयुक्त राष्ट्र सुरक्षा परिषद्को आकस्मिक बैठक बोलाएको छ । संयुक्त राष्ट्रसंघमा रूसका उप–प्रतिनिधि दिमित्री पोल्यान्स्कीले उक्त आकस्मिक बैठक सोमबार हुने अपेक्षा टेलिग्राम मार्फत व्यक्त गरेका छन् ।

उनले असद सरकार पतन हुँदा यसको रूस र मध्य पूर्वमा पर्ने प्रभावबारे अनिश्चितता व्यक्त गरेका छन् ।

पोल्यान्स्कीले विशेष रूपमा गोलान हाइट्समा संयुक्त राष्ट्रसंघको गस्ती क्षेत्रका असैन्यीकृत क्षेत्रमा इजरायलको अस्थायी नियन्त्रणले उत्पन्न परिस्थितिबारे छलफल गर्न आवश्यक रहेको बताएका छन् ।

यसैबीच, राष्ट्रसंघका महासचिव एन्टोनियो गुटेरेसले सिरियाको भविष्य सिरियाली जनताले निर्धारण गर्ने विषय भएको प्रतिक्रिया दिएका छन् ।

उनले सिरियामा व्यवस्थित राजनीतिक संक्रमण सुनिश्चित गर्न धेरै काम गर्न बाँकी रहेको बताएका छन् ।

‘यस संवेदनशील घडीमा शान्ति कायम गर्न र हिंसाबाट बच्न र सबै सिरियाली नागरिकको अधिकारको रक्षा गर्न’ उनले आफ्नो आह्वान दोहोर्‍याएका छन् । कूटनीतिक तथा कन्सुलर परिसर र कर्मचारीको सुरक्षालाई अन्तर्राष्ट्रिय कानुनअनुसार सबै अवस्थामा सम्मान गर्नुपर्ने उनको भनाइ थियो ।

उनले भने, ‘कुनै पनि राजनीतिक संक्रमण समावेशी र व्यापक छ र यसले सिरियाका जनताको सबै विविधतामा वैध आकांक्षाहरू पूरा गर्दछ भन्ने सुनिश्चित गर्न हामीलाई अन्तर्राष्ट्रिय समुदायको समर्थनको आवश्यकता हुनेछ।’

गुटेरेसले अगाडि थपेका छन्, ‘सिरियाको सार्वभौमिकता, एकता, स्वतन्त्रता र क्षेत्रीय अखण्डता लाई पुनर्स्थापित गर्नु आजको पहिलो आवश्यकतामा पर्छ ।’
एजेन्सीहरूको सहयोगमा