आज नरक चतुर्दशी, आज कुकुर तिहार र लक्ष्मीपूजा एकै दिन, बिहान कुकुरको पूजा, साँझ लक्ष्मीको आराधना

१५ कार्तिक, काठमाडाैँ । नेपालीको दोस्रो ठूलो चाड तिहारको तेस्रो दिन आज घर घरमा सुरक्षा गर्ने कुकुरलाई पूजा आराधनासहित मीठा—मीठा खानेकुरा खान दिएर सम्मान गरी मनाइँदैछ । कुकुर तिहार यमपञ्चक अर्थात् दीपावली पर्वको दोस्रो दिन पर्ने भए पनि यसवर्ष तिथिको घटबढका कारण तेस्रो दिन पर्न गएको नेपाल पञ्चाङ्ग निर्णायक विकास समितिले जनाएको छ ।

कात्तिक कृष्ण चतुर्दशीका दिन कुकुरलाई मीठा मीठा परिकार खान दिए यमराजको ढोकामा द्वारपालका रूपमा बस्ने श्याम र सबल नामका कुकुरले यमलोक जाँदा बाटो छोडिदिने धार्मिक विश्वासका आधारमा कुकुर तिहार मनाउने गरिएको बताइन्छ। ४ बजे र १३ मिनेटसम्म चतुर्दशी तिथिसम्म रहेकाे र त्यसपछि अाैंशी लाग्ने हुँदा दीपावली मनाइने छ ।