२८ साउन, काठमाडौं । अन्तर्राष्ट्रिय वायुसेवा कम्पनी हिमालय एयरलाइन्सले कुवेतमा काठमाडौंबाट सिधा उडान गर्ने भएको छ । २० अगस्ट २०२४ देखि कुवेतमा आफ्नो सिधा उडान सुरु गर्ने कम्पनीले जनाएको छ ।
कुवेतमा कार्यरत र बसोबास गर्ने नेपालीको अधिक माग सम्बोधन गर्दै हिमालयले पुनः उडान सुरु गर्न लागेको बताएको छ ।
कम्पनीले कुवेतका लागि जनरल सेल्स एजेन्टका रूपमा सिजर्स ट्राभल ग्रुपलाई नियुक्त गरेको छ ।
सुरुमा काठमाडौं–कुवेत–काठमाडौं हवाई मार्गमा सातामा एक उडान हुने भएको छ । मागका आधारमा उडान थप्ने योजना रहेको समेत कम्पनीले बताएको छ ।
काठमाडौं–कुवेत उडान काठमाडौंदेखि स्थानीय समय अनुसार बिहान ००:४० बजे उड्ने र स्थानीय समय अनुसार बिहान ०३:१५ बजे कुवेत अन्तर्राष्ट्रिय विमानस्थल पुग्ने छ ।
कुवेत–काठमाडौं उडान कुवेतबाट स्थानीय समय बिहान ०४:१५ मा उडान भर्ने र स्थानीय समय अनुसार बिहान ११:५० मा काठमाडौं अवतरण गर्नेछ ।
+ There are no comments
Add yours