Nepal's No. 1 Digital Newspaper

कोरोना परिक्षण रिपोर्ट नदेखाई संसद बैठकमा प्रवेश निषेध

२५ वैशाख, काठमाडौं । वैशाख २६ गते सुरु  हुने स‌ंसद अधिवेशनमा सहभागी हुने सांसदले आफूलाई कोरोना स‌ंक्रमण नभएको रिपोर्ट देखाएपछि मात्र संसद बैठकभित्र प्रवेश गर्न पाउने भएका छन् ।

सभामुख अग्नि सापकोटाको अध्यक्षतामा बसेको कार्य व्यवस्था परामर्श समितिको बैठकले कोरोनाको पीसीआर परीक्षणको रिपोर्ट देखाएरमात्र बैठक हलभित्र प्रवेश गर्न दिने निर्णय गरेको हो । यदि रिपोर्टमा संक्रण देखिएको पाइए  बैठकमा सहभागी हुन पाउने छैनन् ।

Order Now: 98510-87891

नेकपा संसदीय दलकी सचेतक शान्ता चौधरीका अनुसार बिहीबार पीसीआर परीक्षण भएका सांसदहरुको रिपोर्ट ढिलोमा शुक्रबार विहानसम्म आइसक्ने र सो रिपोर्ट देखाएर मात्र सांसदहरुलाई बैठकमा प्रवेश गर्न दिइने सहमति भएको छ । संघीय संसदका दुवै सदनका सांसदहरुको बिहीबार कोरोना परीक्षणका लागि स्वाब संकलन भइरहेको छ ।

काठमाडौं बाहिर रहेका सांसदहरुको स्वाब संकलन शुक्रबार विहानैदेखि हुनेछ । उनीहरु रिपोर्ट नआई संसद बैठकमा भाग लिन नपाउने भएकाले राजधानी बाहिर रहेका धेरै सांसद शुक्रबारको बैठकमा भाग लिनबाट वञ्चित हुने सम्भावना छ ।

चौधरीले भनिन् ‘यसबीचमा हामी सांसदहरु धेरै जनताको बीचमा राहत र मेडिकल सामाग्री लिएर गाउँ गाउँ पुगेका छौं । सांसदको कोरोना परीक्षणले ती क्षेत्रका जनतालाई समेत ढुक्क हुनेछ । रिपोर्ट नदेखाई बैठकमा भाग लिन नदिने कुरा त्यसकारण आएको हो । सांसदमै संक्रमण भेटियो भने त सबैलाई असर गर्छ ।’

सचिवालयले राजधानी बाहिर रहेका सांसदहरुलाई पनि स्वाब संकलनका लागि बोलाइसकेको छ । कार्यव्यवस्था परामर्श समितिको बैठकले संसद अधिवेशन शुरु भइसकेपछि कुनै पनि सांसदलाई काठमाडौं छाडेर निर्वाचन क्षेत्र जान नदिने निर्णय समेत गरेको छ ।

संसद बैठकको ग्यापमा सांसदहरु निर्वाचन क्षेत्र जाने प्रचलन रहेकाले संक्रमणको जोखिम रोक्न यस्तो निर्णय भएको हो । अब संसद अधिवेशनभर कुनै पनि सांसद निर्वाचन क्षेत्रमा जान पाउने छैनन् ।

कार्यव्यवस्था परामर्श समितिले पनि संसद भवन छिर्नेहरु सबैको कोरोना भइरस परीक्षणसहित स्वास्थ्य परीक्षण गर्ने व्यवस्था गर्न स्वास्थ्य मन्त्रालयलाई आग्रह गरेको थियो । संसद् बैठक स्थलमा पनि सांसदहरु बीचको दूरी कायम गरिने गरी व्यवस्था मिलाइएको छ भने संसद् प्रवेश गर्नेहरुले अनिवार्य रुपमा मास्क लगाउनुपर्ने र ज्वरो जाँच गर्नुपर्ने व्यवस्था गरिएको छ । आउँदो शुक्रबारदेखि संघीय संसद्को वर्षे(बजेट) अधिवेशन सुरु हुँदैछ ।

Comments

comments

- Advertisement -

Leave A Reply

Your email address will not be published.