एप्पलका नयाँ ११ फिचर


असार ९, २०७४- एप्पलले तीन साताअघि आफ्नो वार्षिक डेभलपर कन्फ्रेन्सका क्रममा आइफोन र आइप्याडमा प्रयोग हुने आफ्नो अपरेटिङ सिस्टम आईओएसको नयाँ भर्सन घोषण गरेको थियो । सेप्टेम्बरमा सबै प्रयोगकर्ताले नयाँ अपरेटिङ सिस्टम आईओएस ११ प्रयोग गर्न पाउने छन् । एप्पलले घोषणा गरेअनुसार आईओएसमा भएका नयाँ फिचर यस्ता छन् :

१) सुधारिएको सिरी
एप्पलले आफ्नो भर्चुअल असिस्टेन्ट सिरीमा व्यापक सुधार गरेको दाबी गरेको छ । सिरीले प्रयोगकर्ताले आवाजमार्फत दिने निर्देशनअनुसार काम गर्न सक्छ । सिरीमा यो पटक सबैभन्दा सुधारिएको कुरा यसमा अब टाइप गरेर पनि निर्देशन दिन सकिन्छ जसका कारण प्रयोगकर्ताले उच्चारण गर्ने अंग्रेजी सिरीले नबुझ्ने समस्याबाट छुटकारा पाइनेछ ।

२) आइम्यासेजको डिजाइन
आईओएस ११ मा प्रयोगकर्ताले आइम्यासेजमै एप्पल पेको प्रयोग गर्न पाउने छन् । नेपालमा यसको प्रयोग भने हुने छैन । साथै, सबै ठाउँको म्यासेज एकीकृत हुने सुविधा छ जसको कारण प्रयोगकर्ताले एक ठाउँमा कुनै म्यासेज डिलिट गरेपछि स्वत: सबै ठाउँबाट डिलिट हुनेछ । आइम्यासेजमा इमोजी र स्टिकरका लागि छुट्टै स्थान बनाइएको छ जसका कारण प्रयोगकर्ताले म्यासेजमा अक्षरबाट स्टिकर र इमोजीको प्रयोग पनि उत्तिकै सजिलो गरी गर्न सक्छन् ।

३) सुधारिएको क्यामेरा
आईओएसको नयाँ भर्सनले क्यामेरामा पनि सुधार गर्ने एप्पलको दाबी छ । यसले फोटोको गुणस्तर कायमै राखी कम साइजको फोटो खिच्न सघाउनेछ जसका कारण प्रयोगकर्ताको आइफोन र आइप्याडको मेमोरी बचत हुन सक्छ । 
साथै, एप्पले फोटोज एपले गुगल फोटोजले जस्तै फोटो समावेश गरी भिडियोमा रूपान्तरण गर्न सक्नेछ ।

४) क्वीआर कोड रिडर
आईओएस ११ को प्रयोग गर्ने आइफोन प्रयोगकर्ताका लागि क्वीआर कोड रिड गर्न अन्य एपको भर गर्नुपर्ने बाध्यता हट्नेछ । नयाँ अपरेटिङ सिस्टम इन्स्टल गरेपछि आइफोनको क्यामेराले आफैं क्वीआर कोड स्क्यान गर्न सक्छ । सामसुङले यसअघिकै केही फोनमा प्रयोग गरिसकेको यो फिचर एप्पलले भर्खरै ल्याएको हो ।

५) कन्ट्रोल सेन्टर
नयाँ आईओएसमा कन्ट्रोल सेन्टरलाई सुधारिएको छ । कन्ट्रोल सेन्टरलाई एकै पेजमा केन्द्रित गरिएको छ र यसको डिजाइनमा सुधार गरिएको छ । प्रयोगकर्ताले होम बटनमा केहीबेर थिचेर कन्ट्रोल सेन्टरको सुविधा लिन सक्छन् । 

६) डु नट डिस्टर्ब
यो सुविधाले अन गर्दा आइफोनले प्रयोगकर्ताले ड्राइभिङ गरिरहेको अवस्था पहिचान गर्छ र फोन गर्नेहरूलाई स्वत: यो जानकारी दिन्छ । 

७) एप स्टोर
एप स्टोरलाई एप्पलले सुधार गरेको छ र यसको डिजाइन परिवर्तन गरिएको छ । एप स्टोरमा प्रयोगकर्ताले रिकमेन्डेड एपहरू पनि देख्न सक्नेछन् । 

८) स्क्रिन रेकर्डिङ
यो फिचर सामसुङले आफ्नो फोनमा सुरु गरिसकेको छ । आईओएस ११ का प्रयोगकर्ताले भने आफ्नो आइफोनमा अन्य एपको सहारा बिना स्क्रिन रेकर्डिङको सुविधा अब पाउने छन् । जसका कारण प्रयोगकर्तालाई आफ्नो फोनको गतिविधि रेकर्ड गरी भिडियोका रूपमा सेभ गर्न सजिलो हुनेछ । 

९) स्क्रिन सट इडिट
यसअघि आइफोनका प्रयोगकर्ताले स्क्रिन सट लिइसकेपछि फोटो रोलमा गएर स्क्रिन सट छानेपछि बल्ल इडिट गर्ने सुविधा पाउँथे । अब भने प्रयोगकर्ताले स्क्रिन सट लिनेबित्तिकै इडिट गर्ने अप्सन पाउने छन् ।

१०) अफलोड एप
आईओएस ११ मा आइफोनले आफ्नो स्पेस कम भएमा प्रयोगकर्ताले कम प्रयोग गर्ने एपलाई स्वत: निष्क्रिय पार्न सक्नेछ । यसका लागि प्रयोगकर्ताले अफलोड अनयुज्ड एप फिचरलाई इनेबल गर्नुपर्नेछ । यसले आइफोनमा स्पेस कम भए कम प्रयोग हुने एपलाई स्वत: निष्क्रिय पार्नेछ र प्रयोगकर्ताले चाहेका बेला त्यसलाई फेरि सक्रिय बनाउन सक्नेछ । यसो गर्दा एपको पुरानो डाटा भने सुरक्षित रहनेछ ।

११) वान ह्यान्ड मोड
आइफोन प्रयोगकर्ताले अब एक हातले टाइप गर्न मिल्ने गरी आफ्नो मोबाइल किबोर्डलाई सानो बनाउन सक्नेछन् । आईओएस ११ मा वान ह्यान्ड मोड इनेबल गर्न मिल्ने सुविधा हुनेछ जसले मोबाइलको किबोर्ड एक हातले टाइप गर्न मिल्ने खालको सानो बनाउन मिल्नेछ ।

Exclusive News : यो पनि पढ्नुहोस

Leave a Facebook Comments

Your comments here

Leave a Reply

Your email address will not be published. Required fields are marked *

wordpress