नेपाल पहिलो गन्तव्य


पुस २२, २०७२- भूकम्प र भारतको नाकाबन्दीले थिलथिलो बनेको पर्यटन उद्योगलाई ठूलै बल पुग्ने गरी बेलायती प्रकाशन गृह ‘रफ गाइड’ ले नेपाललाई २०१६ का लागि पहिलो पर्यटकीय गन्तव्यमा राखेको छ ।

‘हिमालयदेखि तराईका जंगलमा पाइने बाघ, हात्ती र गैंडासहित विविधतापूर्ण परिदृश्य भएको नेपाल २०१६ मा भ्रमणको पहिलो विकल्प हुन सक्छ,’ रफ गाइडका लागि नियात्राकार/लेखक सफिक मेग्जीले ई–पुस्तकमा लेखेका छन्, ‘नेपालको सांस्कृतिक परिदृश्य उसको भूगोलजस्तै विविधतापूर्ण छ ।’

उक्त प्रकाशन गृहले पर्यटकीय गन्तव्यबारे सूचना पुस्तिकासहित सन्दर्भ सामग्री प्रकाशन गर्दै आएको छ । तिब्बतसँग सीमा जोडिएको नेपाल देशाटनका लागि उपयुक्त रहेको उल्लेख गर्दै पदयात्राबारे गहन ई–पुस्तक प्रकाशन गरिएको हो ।

नेपाल भ्रमण गर्न चाहनेले उक्त पुस्तक अनलाइनमार्फत १८ डलरमा खरिद गर्न सक्छन्, जसलाई एप्पल र एन्ड्रोइड अपरेटिङ प्रणाली रहेका ग्याजेट र किन्डलमार्फत अध्ययन गर्न सकिन्छ ।

चर्चित प्रकाशन गृह ‘पेनगुइन र्‍यान्डम हाउस’ ले सञ्चालन गरेको ३४ वर्ष पुरानो रफ गाइडले विश्वभरका पर्यटकीय गन्तव्यबारे जानकारीमूलक सामग्री प्रकाशित गर्छ । विश्वभर वितरण हुने यसका प्रकाशन पर्यटन उद्योगमा प्रख्यात मानिन्छन् ।

विनाशकारी भूकम्पपछि पर्यटन उद्योग पुन: ब्युँतिने प्रयासमा रहेको ई–पुस्तकमा उल्लेख छ । भूकम्पबाट लाखौं घरबारविहीन भएका र दैनिक जीवन पूर्ण सामान्य अवस्थामा आइनसकेको मेग्जीले लेखेका छन् ।

ऐतिहासिक स्थल भने बिस्तारै पुन:स्थापित भइरहेको र पदमार्गहरू पनि पुन: सुचारु भइरहेको जानकारी पनि दिएका छन् ।

मेग्जीले पुस्तकमा बौद्ध, पाटन दरबार, अन्नपूर्ण, सगरमाथा आधार शिविर, माथिल्लो मुस्ताङ, नदीमा र्‍याफटिङ, चितवन र बर्दियाको बाघ सफारीबारे वर्णन गरेका छन् । नेपालबारे साढे पाँच मिनटको श्रव्यदृश्य सामग्री पनि वेबपेजमा राखिएको छ, जसमा बौद्ध र हिन्दु धर्मको अद्वितीय गन्तव्य बनेको मुलुक (नेपाल) भर फैलिएका थुप्रै जातीय समूहले पनि यसलाई पृथक् गन्तव्य बनाउन मद्दत गरेको उल्लेख छ ।

उत्कृष्ट १० मा नेपाल पहिलो नम्बरमा राखिएको छ । त्यसपछि कोलम्बिया, क्युबा, जोर्डन, अल्बानिया, रोमानिया, एल साल्भाडोर, वेल्स, केन्या र श्रीलंका छन् । यसअघि मंसिरमा नेसनल जोग्राफिक च्यानलको ट्राभलर म्यागजिनले पनि नेपाललाई पर्यटकीय गन्तव्यको अग्रस्थानमा राखेको थियो ।

उक्त सूचीमा नेपालपछि चीनको सांघाई, मोजाम्बिक, बोस्निया, रियो दी जेनेरियो, अर्जेन्टिनालगायत थिए ।

Exclusive News : यो पनि पढ्नुहोस

Leave a Facebook Comments

Your comments here

Leave a Reply

Your email address will not be published. Required fields are marked *

wordpress